Síðan eg sá Kiss Kiss Bang Bang í 2005, havi eg verið fjeppari av Shane Black. Hann er fyrst og fremst leikritskrivari, men hevur eisini leikstjórnað nakrar filmar gjøgnum árini. Hansara serliga eyðkenni er 80’ara buddy cop filmar. Av hesum hevur hann, millum annað, skrivað Lethal Weapon og the Last Boy Scout. Ì 2013 leikstjórnaði hann Iron Man Three, ið bleiv móttikin við blandaðum ummælum. Men nú er hann aftur við einari buddy comedy, the Nice Guys. Hetta er triði filmurin Shane Black hevur leikstjórnað. Av tí at eg eri mega fjeppari av Kiss Kiss Bang Bang, var eg sera spentur at síggja hendan filmin.
Søgan
Holland March(Ryan Gosling) er privat detektivur í 70’unum. Tað gongur ikki so væl hjá honum at fáa góðar sakir at uppklára. Jackson Healy(Russell Crowe), ið hóttir fólk fyri pengar, er blivin hýrdur at forskrekkja March frá einari sak. Sakin er um eina pornostjørnu, ið doyði í einari ferðsluvanlukku, sum onkur heldur vera eitt morð. March og Healy finna skjótt út av at sakin kann gagna teimum báðum. Teir sláa seg tí saman at loysa gátuna.
Samanumtøka
Ryan Gosling og Russell Crowe eru tveir fantastiskir sjónleikarir og teir spæla væl saman. Holland March er ófantaligur og kemur altíð til at meiðsla seg, meðan Jackson Healy dámar væl at sláa fólk. Eg elski 80’ara politifilmar sum Beverly Hills Cop, Lethal Weapon og Die Hard. The Nice Guys er gjørdur í hesum andanum. Hann er fullur av action, undirhaldi og one-liners. Tað skal tó sigast at the Nice Guys minnir nógv Kiss Kiss Bang Bang. Báðir handla um tveir menn, sum blanda seg har teir ikki skulu. Men alíkavæl gjørdi hetta ikki filmin verri. Um tú hevur brúk fyri at slappa av og hyggja eftir einum stuttligum filmi við massar av action, so er hetta tann rætti filmurin til tín.
Eg gevi the Nice Guys 5/6 sofum:
Um tær dámdi hendan filmin, kann eg viðmæla:
Die Hard, Kingsman, Lethal Weapon, Last Action Hero og the Last Boy Scout.
Hvat geri eg við lívið hjá mær? Eg veit at Adam Sandler stinkar. Hví hyggi eg so eftir hansara filmum? Ringast av øllum er, at eg hugdi eftir Ridiculous Six á Netflix, lógliga. Tí eri eg nú luttakari í statistikkunum, sum sigur, at tað er populerasti filmur NAKRANTÌÐ á Netlix. Eg veit ikki um tað kann fyrigevast, men eg eri noyddur at líva við tí. Tá fólk siga at lortur rullar í undanbrekku, er tað Adam Sandler tey tosa um?
Søgan
Tommy “White Knife” Stockburn er ein hvítur maður, ið er uppvaksin saman við indiánarum. Hann hevur aldrin kent pápa sín. Ein dag kemur biologiski pápi hansara, Frank Stockburn, aftur. Hann fortelur soninum at hann noyðist at skaffa $50.000, ella verður hann dripin av sínum fyrrverandi banda. Tá Frank verður tikin til fanga av bandanum, tekur Tommy tað á seg at finna nokk av peningi, so pápi hansara kann blíva leyslatin. À ferðini kemur hann eisini fram á sínar 5 hálvbrøðir, ið allir deila sama pápan, Frank Stockburn.
Hondina upp, um tú heldur hesin filmurin ikki verður góður!
Samanumtøka
Eg haldi at Adam Sandler roynir at gera okkurt Three Amigos líknandi, men fær tað heldur til at síggja út sum eitt alvorligt tilfeldi av diarré. Har er null komedia og býttar fartjokes. Adam Sandler stingur ein mann í lærið við einari gularót. Cowboy klæðini og parykkarnar síggja meiri út sum eitt føstulávintsball í 2016, enn nakað frá 1800 talinum. Adam Sandler, hvat gert tú við okkum? Eg fari ikki at hyggja eftir tínum næsta filmi, sjálvt um hann er ókeypis. Lat okkum fáa klassiskar komediufilmar aftur. Humor kann vera flatur, men ongin sigur at hann skal vera býttur. Adam Sandler hevur eina kontrakt við Netflix, um at gera fleiri filmar. Vís okkum at tú kann vera stuttligur. At enda havi eg onki gott at siga um hendan filmin. Kanska smábørn halda hann vera stuttligan.
Leonardo Dicaprio vann ein Oscar herfyri. It’s been a long time coming, sagt á góðum enskum. Eg haldi sjálvur, at av hansara Oscar nomineringum, er hetta kanska tann minst uppiborna. Tað er nú ikki lítið sagt, tá tað er Leonardo vit tosa um. Hann er í einum klassa fyri seg. Men eg haldi at hann skuldi vinna ein Oscar fyri the Wolf of Wall Street. TAÐ var ein leiklutur og filmur, ið var out of this world. Lat meg ikki klaga meir. Leonardo DiCaprio hevur ein Oscar. So nú kunnu vit øll sova gott.
Søgan
Àrið er 1883. Hugh Glass er veiðimaður. Hann fraktar skinn við øðrum veiðimonnum, tá teir verða álopnir av indiánarum. Fyri at náa heim, eru teir noyddir at goyma skinnini og fara eftir teimum aftur seinni. À leðini heim er Hugh so óheppin, at hann verður álopin av einari bjørn. John Fitzgerald lovar at bera løstaða mannin heim fyri eyka pening. Men tá teir eru einsamallir, letur hann Hugh liggja eftir. Sjálvt um Hugh ikki fær gingið, er hann so settur uppá at fáa sína hevnd, at hann spakuliga byrjar at grulva seg eftir John.
Samanumtøka
Man skuldi trúð at legendan um Hugh Glass var ein søgn, men hon er frá veruleikanum. Okkurt er lagt afturat søguni, fyri at gera hana meiri dramatiska. Men meginparturin passar. Hetta er nokk mest fysiski leikluturin, ið Leonardo Di Caprio hevur spælt. Dialogurin er minimalur og Hugh Glass tosar ikki nógv meir enn Mad Max Fury Road. Sum Leonardo altíð ger, er hann so dedikeraður til at vera Hugh Glass, at eg ivaðist ikki í at Leo var hann. Tað er nakað sum eg altíð fái burturúr filmum við Leonard DiCaprio. Hann spælir teir so væl, at tað følist sum hann eigur leiklutin.
The Revenant er ikki bara Leonardo, men eisini tær einastandandi myndirnar, ið leikstjórin Alejandro G. Iñárritu hevur upptikið. Produktiónin hevði nógvar avbjóðingar, tí filmurin bleiv bert upptikin í dagsljósi um veturin. Tað er ikki spart uppá harðskapin og filmurin er eisini ekstremt realistiskur. Tí eru nógvar av hendingunum óbehagiligar og vamlisligar. Hetta ger filmin góðan, men eisini nóg mettandi til bara at hyggja eftir eina ferð.
The Revenant fortelur eina ótrúliga, visuella søgu, ið heilt sikkurt hevur uppiborið tríggjar Oscars. Harímillum besta leiklut og besta leikstjóra.
Eg gevi filminum 5/6 sofum:
Um tær dámdi hendan filmin, viðmæli eg:
Mad Max: Fury Road, the Good, the Bad and the Ugly, the Hateful Eight og Kill Bill
Tað frættist í gjár, frá leikstjóranum, at Star Wars: Episode VIII er komin hálvan vegin við upptøkunum.
Ì tí sambandi legði Rian Johnson tvær svart/hvítar myndir út av leikpallinum, saman við hesum boðunum:
“Good. Bad. I’m the guy with the microfiber sham.”
I can’t believe we’re halfway through the shoot. (We’re halfway through the shoot!)
Sum Rian skrivar, fáa vit eina mynd frá hvørjari síðu av kampinum.
À fyrru myndini síggja vit ein X-Wing Fighter.
Seinna myndin er av the First Order.
Tað kókar longu við spenningi. Og eg gleði meg til Episode VIII kemur í biografin tann 15. Desembur 2017.
Men Vit skulu ikki bíða so longi at síggja ein Star Wars film aftur. Tí Rogue One: A Star Wars Story kemur út 16. Desembur í ár.
Rogue One er ein Star Wars prequel, ið fyrigongur millum Episode III og IV. Jyn Erso, ein Rebellion herðkvinna, fær eina stóra avbjóðing. Hon skal stjala tekningarnar av the Death Star.
Tað sum er spennandi við hesum filminum, er at møguleiki er fyri at Darth Vader er í honum.
Fyrsti teasarin er longu útkomin:
Eg ræðist hæddir. Alíkavæl má eg bjóða mær sjálvum av við einum fjallatúri av og á. Vit hava jú eina vakra náttúru í Føroyum. Tað er synd at lata eitt upplivilsi fara til spillis, bara tí eg ræðist hæddir eitt sindur. Men tankin um at ganga á línu yvir World Trade Center, er ikki nakað tey flestu av okkum hava nossir til – og so í hvørtfall ikki eg. The Walk er ein søga frá veruleikanum, um Philippe Petit, ið gekk millum World Trade Center bygningarnar, the Twin Towers, á einari línu. Tað sigst, at fólk, ið sóu the Walk í biografinum, spýðu av at síggja línugangarin spáka yvir World Trade Center.
Søgan
7. August í 1974 gekk Philippe Petit yvir World Trade Center á einari línu. Hetta var fyrstu og síðstu ferð nakar gjørdi tað. Sum 16 ára gamal fann Philippe út av, at hann elskaði at gangá á línu. Innan eitt ár hevði hann meistrað teknikkin. Nú var hansara einasta forðing nýggjar avbjóðingar. Ì 1968, tá Philippe sat og bíðaði eftir tannlæknanum, sá hann fyri fyrstu ferð ætlanina at byggja World Trade Center í New York. Tá lovaði hann sær sjálvum, at hann skuldi ganga á línu yvir bygningarnar. Philippe flutti seinni til New York, har hann samlaði sær ein bólk av fólkum, ið skuldu hjálpa honum við ætlanini.
Samanumtøka
The Walk er settur saman sum ein heist filmur, ið líkist Ocean’s Eleven og the Italian Job. Tað riggar væl, tí ætlanin hjá Philippe er ólóglig og krevur umfatandi fyrireikingar. Philippe stendur á fríheitsgudunduni, við Twin Towers í bakgrundini, og fortelur sína upprunasøgu. Forteljingin hevur sama stíl sum Forrest Gump, har Forrest situr á einum bonki og fortelur sína søgu. Tað er eisini Robert Zemeckis, ið hevur leistjórnað báðar filmarnar.
Joseph Gordon-Levitt sleppur væl frá at spæla Philippe Petit. Eg havi eitt soft spot fyri honum sum sjónleikara, og eg vænti, at hann einaferð verður ein Oscar nomineraður sjónleikari.
Eg føldi sveittan í lógvunum, tá Philippe traðkaði á línuna. Tað er gott at eg ikki hugdi eftir filminum í biografinum. Tí so hevði eg nokk spýð.
The Walk er til síðst ikki bert um bragdið hjá Philippe Petit. Men eisini søgan um tveir kontórbygningar, ið blivu varðar fyri dirvi. Àðrenn bragdið vórðu teir sæddir sum skrímsl, men Philippe gav teimum sál. Seinni bleiv lagnan tíverri ein onnur, tá yvirgangsmenn gjørdu enda á the Twin Towers.
Eg gevi the Walk 4/6 sofum:
Um tær dámdi hendan filmi, viðmæli eg:
Forrest Gump, Ocean’s Eleven, Inception, Resevoir Dogs, Die Hard og the Ususal Suspects.
Mai verður stóri superhetju mánaðin í ár. Captain America: Civil War og X-Men: Apocalypse koma út í mai. Tilsamans havi eg funnið 6 potentielt góðir filmar, sum koma út hendan mánaðin. Burtursæð frá superhetju filmunum, eri eg serliga spentur uppá the Nice Guys og Neighbors 2.
4. Mai
Captain America: Civil War
Captain America: Civil War er á stødd við Avengers filmarnar – við Ant-Man, Iron Man, Black Panther, Falcon, the Winter Soldier, Black Widow, Vision, War Machine, Scarlet Witch, Hawkeye og Spider-Man. Wow! Hasin listan endaði næstan ikki
Fox hevur áður átt rættin til at brúka Spider-Man. Men Marvel og Fox hava gjørt eina avtalu, har teir kunnu deilast um superhetjuna. Hetta er aftaná the Amazing Spider-Man 2 floppaði hjá Fox.
Tað verður spennandi at síggja Spider-Man saman við Marvel legendunum, har hann hoyrir heima.
Civil War er ein legendarisk Marvel søga, um óeinigheitir millum Iron-Man og Captain America. Hetta noyðir teir báðar í eitt kríggj móti hvørjum øðrum.
13. Mai
Money Monster
Jodie Foster er farin frá sjónleikaralívinum til at leikstjórna filmar.
Við George Clooney og Julia Roberts, má hesin filmurin hava okkurt spennandi í ermuni. Men tað eru ikki bara nøvnini, ið er tiltalandi her. Filmurin sær spennandi út.
Lee Gates er vertur í einari beinleiðis íløgusending. Hann verður, saman við sínum framleiðara, settur í eina ræðuliga støðu, tá ein óheppin íløgumaður, við einari løddari byrsu, brýtir seg inn í sjónvarpsrúmið.
20. Mai
Neighbors 2: Sorority Rising
Eg kom av óvart á trailarin til hendan filmin. Tí var tað heilt óvæntað at ein uppfylgjari til Neighbors var á veg.
Men Seth Rogen og Zac Eftron eru aftur. Fara teir at vera high? Allarhelst. Neighbors 1 var sera undirhaldandi. Vónandi verður Neighbors 2 á sama støði.
Ì Neighbors 2 fáa Mac og Kelly aftur problemir, tá eitt nýtt sorority flytir inn við síðuna av. Hesa ferð eru tað ikki villir drongir, men gentir. Tá tey ikki vita hvat tey skulu gera, fáa tey hjálp frá fyrrverandi rivalinum, Teddy Sanders.
The Nice Guys
Kiss Kiss Bang Bang, við Robert Downey Jr. og Val Kilmer, er ein av mínum favoritt filmum. The Nice Guys er leikstjórnaður av sama manni, Shane Black. Hann hevur áður skrivað manuskriptini til Lethal Weapon filmarnar, the Last Boy Scout og Last Action Hero.
Ryan Gosling er privat detektiv í 70’unum. Ein pornostjørna er deyð og ein genta er vekk. Saman við Russell Crowe, ið er ein leigurhermaður, roynir hann at loysa gátuna.
27. Mai
X-Men: Apocalypse
Tað er ótrúligt at X-Men kláraði at at hála seg úr rennuni aftur, aftaná X-Men: The Last Stand. Tann filmurin var ein vanlukka. Men nú eru vit komin á endan av einari nýggjari trilogi. Seinasti filmurin, X-Men Days of Future Past, er nokk tann besti X-Men filmurin higartil. Vónandi er X-Men: Apocalypse líka góður.
Fyrsti mutanturin nakrantíð, Apocalypse, er ódeyðiligur. Tá hann vaknar, aftaná at hava sovið í yvir túsund ár, er hann ikki nøgdur við heimin sum hann er. Hann tekur tí stig til at gera nakað við tað og útrudda øll vanlig menniskju.
Alice Through the Looking Glass
Tim Burton setti lív í Alice in Wonderland universið aftur. Tað eru nógvir filmar og teknifilmar gjørdir av Alice in Wonderland gjøgnum tíðina. Men hetta var tann fyrsti modernaði filmurin. Tim Burton vendur ikki aftur til Alice Through the Looking Glass, men allir uppruna sjónleikararnir eru við. Johnny Depp, Anne Hathaway og Helena Bonham Carter.
Alice fer aftur til Wonderland, men the Mad Hatter er í vanda. Alice er noydd at hjálpa the Mad Hatter úr klørnunum á Time, ið ætlar at oyðileggja Wonderland.
So eru vit komin til Mars. Eg havi funnið fimm filmar, ið vónandi góðir hendan mánaðin. Veikast á hesum listanum, er tann fyrsti, London Has Fallen. Niðast á listanum er Batman V. Superman, ið kann fara báðar vegir. Alíkavæl er hann tann sterkasti á listanum. Mest av øllum vóni eg, at 10 Cloverfield Lane verður eitt hit.
4. Mars
London Has Fallen
Ì fyrsta filminum, Olympus Has Fallen, var Mike Banning fangaður í hvíta húsinum saman við terroristum (luktar av Die Hard rip-off). Nú er Hann til jarðarferð hjá forsætisráðharranum í Bretlandi. Tað gongur sjálvandi ikki serliga væl, tí Mike Banning varnast við, at terroristar ætla at beina fyri øllum heimsins leiðarum.
London Has Fallen sær ikki út sum ársins filmur. Kanska tær dámar Gerard Butler og Morgan Freeman. Tað kann eisini vera at tú bara hevur hug at síggja London brenna. Okkurt sigur mær, at Michael Bay fer at hyggja eftir hesum filminum.
Zootopia
Um tað er Disney Pixar, er tað gott. So longi tað ikki er Cars. Um tað er Cars, so sokkar tað.
Ì Zootopia búgva øll djórini saman. Judy, ið er kanin, hevur fingið starv sum fyrsti politistur av sínum slag í býnum. Ongin trýr at hon fer at klára seg væl. Tí verður hon bert sett at arbeiða sum parkeringsvaktur. Men Judy vil heldur finna út av, hvat tað er, sum hevur fingið fleiri djór í býnum at loypa á onnur djór. Tað ger hon við hjálpini frá svikarevinum, Nick, ið var vitni til ein at tilburðunum.
Pixar kann bara ikki lata vera við at gera fittar og genialar filmar. Síðan Toy Story, í 1995, hava vit fingið klassikarar, sum the Incredibles, Finding Nemo og Up. Ì framtíðini fara fleiri spennandi Pixar filmar at koma út. Toy Story 4, the Incredibles 2 og Finding Dory. Bert fyri at nevna nakrar.
11. Mars
10 CLoverfield Lane
Ein ung kvinna vaknar í einum bumbukjallara, aftaná hon hevur verið í einari ferðsluvanlukku. Eigarin, Howard, sigur at hon ikki kann fara út, tí heimsins undirgangur er komin. Passar tað sum hann sigur, ella hevur hann kidnappað hana?
Hetta má vera ársins trailari. Stemningurin við sanginum, I Think We’re Alone Now, gevur mær gásarhold. John Goodman er við í filminum, og tað er nokk fyri meg. Tí John Goodman er fantastiskur! Vónandi er hesin filmurin so spennandi, sum hann sær út til at vera. Eg gleði meg í hvørtfall.
The Brothers Grimsby
Brøðurnir Grimsby vórðu skildir sum børn. Annar beiggin, Sebastian, verður agentur. Meðan hin beiggin, Nobby, er ein typiskur enskur fótbóltsfjeppari frá einum fátækum fiskarabýi. Nobby hevur leitað eftir beiggja sínum í 28 ár. Tá hann endiliga finnur hann, verður hann av óvart eisini blandaður uppí eina ætlan, at gera enda á øllum heiminum. Nú er hann noyddur at hjálpa beiggjanum, Sebastian.
Tá tað kemur til at gera góðar skemtifilmar, er tað ofta longi ímillum snapsarnar. Sacha Baron Cohen hevur gjørt fleiri stuttligar filmar gjøgnum árini. Vónandi er hesin ein av teimum. Trailarin er í hvørtfall stuttligur. The Brothers Grimsby sær út sum ein blanding av Kingsman og Johnny English. Vònandi er tað gott.
25. Mars
Batman V. Superman: Dawn of Justice
Batman er bangin fyri hvat Superman kann brúka sína styrkju til. Meðan teir báðir berjast móti hvørjum øðrum, kemur ein nýggj hóttan til býin, Metropolis. Nú eru Batman og Superman noyddir at grava øksina. Saman við Wonder Woman, skulu teir nemliga berjast móti kenda rivalinum hjá Superman, Lex Luthor.
Eg má siga sum er. At byrja við var eg ikki serliga spentur um hendan filmin. Fyrri Superman filmurin, Man of Steel, var í besta føri lunkaður. Men aftaná at hava sæð hendan trailarin, eri eg imponeraður. Ben Affleck sær út til at passa væl inn í leiklutin, sum Bruce Wayne. Vit fáa at síggja tann 25. Mars.
Niðurstøða
Byrjanin á árinum bjóðar ikki altíð uppá teir bestu filmarnar, tá hetta er ein tann ringasta tíðin á árinum, at geva filmar út. Tann heilt stóri filmurin hesaferð er onki at ivast í. Batman V. Superman: Dawn of Justice hevur verið hypaður í tvey ár eftir hondini. So hann hevur eitt sindur at liva upp til.
Eg mest spentur uppá 10 Cloverfield Lane og Batman V. Superman: Dawn of Justice hendan mánaðin. Eg eri eitt sindur í iva, um nakar av teimum verður góður, men eg livi við vónini.
Tað tók langa tíð at fáa Deadpool filmin gjørdan, men nú er hann her. Filmurin fór í produktión í 2004, og Ryan Reynolds, ið spælir Wade Wilson, hevur líka síðan kempað fyri at fáa hann til veruleika. Trupulleikin hevur altíð verið, at Deadpool tekniserian er eyðkend fyri vold, og at Deadpool sjávur dámar væl at brúka seg – hann verður jú eisini kallaður fyri the Merc with a Mouth. Tískil er Deadpool serian ikki egnað til børn, og tað sá filmproduktiónin sum mistir pengar. Alt hetta broyttist í 2012, tá ein stuttfilmur bleiv likin av Deadpool, og fjepparir vístu so stóran áhuga, at filmurin endiliga fekk grønt ljós.
Søgan
Wade Wilson er hermaður, sum ikki longur er í tænastu. Tá hann endiliga hevur samlað lívið hjá sær og skal giftast við gentuni, hann elskar, fær hann staðfest deyðiligt krabbamein. Men hann er ikki klárur at doyggja. Tí meldar hann seg til eitt eksperiment, ið kann lekja krabban. Undir eksperimentinum endar Wade Wilson tó umframt at gerast frískur eisini at fáa super lekjandi evnir. Tíverri ger eksperimentið eisini, at hann verður so misháttur, at hann ikki torir at fara aftur til damuna hjá sær. Wade fær sær superhetjunavnið, Deadpool, og setur sær fyri at finna mannin, ið gjørdi hetta við hann. Nú skal Deadpool hava hevnd.
Niðurstøðan
Sum nógv onnur hava sagt áðrenn meg, spælir Ryan Reynolds ikki bara Deadpool – hann er Deadpool. Hetta er besti leikluturin hann nakrantíð hevur spælt. Hann hevur gjørt ein Matthew McConaughey. Bei bei, Wan Wilder. Halló, Deadpool. Filmurin tekur ikki seg sjálvan seriøst, og tað er har hann er sterkast. Av tí at ongin væntaði, at Deadpool fór at hála sekkir av pengum inn, fekk hann ikki líka nógv at arbeiða við fíggjarliga, sum aðrir stórfilmar fáa. Hetta verður vent til eina styrkju, har Deadpool allatíð gloymir tey bestu vápnini heima, og síðan skemtar um, at pengar ikki eru til vill showdowns. Filmurin byrjar mitt í søguni, har vit síggja flashbacks av lívinum hjá Wade Wilson, ið byggir upp til, at hann verður til Deadpool.
Tað er stórur munur á Deadpool og øðrum superhetjum, tí hann veit av, at hann er í einum filmi eins og Frank Underwood í House of Cards.
Filmurin var alt tað eg vildi hava hann at vera. Hann er actionpakkaður, raunchy og stuttligur. Deadpool brýtir seg úr mongdini av superhetju filmum og roynir nakað nýtt. Tað er akkurát soleiðis vit vilja hava tað.
Eg gevi Deadpool 6/6 sofum:
Hevur tú hug at síggja líknandi filmar?
Eg viðmæli Kick Ass, the Punisher, Kill Bill og Mad Max.
Tá eg var 8 ár, helt eg Adam Sandler vera verðins stuttligasta sjónleikara. Enntá stuttligari enn Jim Carrey. Ja ja, eg var bara 8 ár. Hvussu skuldi eg vita betur? Eg átti the Waterboy á video, og hugdi eftir honum so ofta, at bandið fór at flimra. Men eldri eg bleiv, minni stuttligur bleiv Adam Sandler. Síðsti filmurin, ið hevði nakra vón var Click. Síðan tað hava filmarnir hjá honum verið the bottom of the pit. Hugsa Jack and Jill. Mær nýtist ikki at síggja hann, fyri at vita hvussu vánaligur hann er. Bara við at hyggja eftir trailarinum fái eg vaml. Adam Sandler spælir Jill, ið fer at vitja beiggja sín, Jack, eisini leiktur av Adam Sandler. Koyr í skrell!
Hann skal ikki bara fáa bad credit frá mær alíkavæl. The Wedding Singer er genialur. Tað er Punch-Drunk Love eisini. Tað kann ikki sigast at Adam Sandler er sum vín, tí hann er í hvørtfall ikki blivin betur við tíðini. Hann er kanska meira sum ein mjólkapakki, tí hann gekk út aftaná Punch-Drunk Love.
Nú spola vit fram til 2015. Adam Sandler spælir høvuðsleiklutin í Pixels saman við Kevin James, Josh Gad, Michelle Monaghan og Peter Dinklage. Eisini er filmurin leikstjórnaður av Chris Columbus. Hann hevur áður leikstjórnað Harry Potter, Mrs. Doubtfire og Home Alone. Adam Sandler kann ikki gera hendan filmin alt ov vánaligan, ha?
Eg gav honum ein kjans, tí eg haldi hugskotið vera framúrskarandi. Rúmdarverur leypa á jørðina sum videospøl frá 80’unum. GE.NI.ALT! Ja, Adam Sandler er við. But we’ll let it slide.
Søgan
Sam Brenner(Sandler), Will Cooper(James), Ludlow Lamonsoff(Gad) og Eddie “The Fire Blaster”(Dinklage) spældu arcade spøl, tá teir vóru børn. Pac-Man, Donkey Kong, Space Invaders og nógv onnur klassisk spøl. ì einari kapping teir spældu í 80’unum, blivu øll spølini send út í rúmdina aftaná, har intelligentar verur kundu finna tey. Tá teir eru vaksnir, verður jørðin invaderað av rúmdarverunum, ið hava misforstaðið spølini tær funnu. Rúmdarverurnar halda at jørðin vil í kríggj móti teimum og avbjóða tí jørðini sum hesi spølini. Nú mugu vaksnu vinmennirnar vinna spølini, ella spreingja rúmdarverurnar jørðina.
Samandráttur
Post-sýning má eg siga, at alt tað eg væntaði var gott við hesum, var kul, og alt tað eg væntaði, at eg ikki fór at dáma, var vánaligt. Tað er nógv potentiali í Pixels, men Adam Sandler og Kevin James eru irriterandi. Teir beinleiðis oyðileggja filmin við teirra leiklutum. Adam Sandler spælir einasta persónin hann hevur dugað nakrantíð, sum er eitt grenjandi manchild, ið elskar at rópa eftir øllum. Eg kann næstan ikki hyggja eftir manninum. Dialogurin er heldur ikki tann besti. Afturímóti eru Peter Dinklage, Josh Gad og Michelle Monaghan á heilt góðari leið. Filmshandritið er heldur ikki tað besta og tað sæst eisini, at sjónleikararnir avmarkaðir av hesum. Eg dugi væl at síggja hvussu hesin filmurin kundi verið ótrúliga stuttligur. Eg komi ikki yvir hvussu gott hugskotið við søguni er. Eg má bara liva við at Adam Sandler altíð fer at vera eitt man child og eg eri langtsíðan vaksin frá vrøvlinum hjá honum.
Eg gevi filminum 2 av 6 sofum:
Eg viðmæli heldur at hyggja eftir onkrum øðrum stuttligum filmi. Superbad, Dumb and Dumber, Monty Python and the Holy Grail, Airplane ella Ghostusters.
P.S. Eg lærdi ikki av hesum. Tí eg havi eisini hugt eftir einum øðrum Adam Sandler filmi í jólaferiuni. Men tað taka vit ein annan dag.
Ì dag er jólaaftan. Meðan vit bíða eftir dunnuni, ella gásini, er tað gott at fáa tíðina at ganga við onkrum øðrum. Ein jólafilmur er kanska akkurát tað rætta. Men hvørja ferð eg skal hyggja eftir jólafilmum, eru tað teir gomlu eg taki fram. Christmas Vacation, Scrooged, the Nightmare Before Christmas og aðrir. Hesir eru allir filmar komnir út áðrenn ár 2000. Tí vildi eg finna nakrar jólafilmar fram, sum eru komnir út í árunum aftaná 2000.
A Very Harold & Kumar 3D Christmas
Àr: 2011
Triðji filmurin um Harold og Kumar. Aftaná teir hava leitað eftir einum burgara og seinni rýmt frá Guantanamo Bay, skulu teir nú bjarga jólunum. Harold er blivin familjumaður, meðan Kumar enn er tann sami gamli stonarin. Tá Kumar av óvart brennur jólatræið hjá Harold niður, eru teir noyddir at finna eitt nýtt træ í New York áðrenn jólaaftan.
How the Grinch Stole Christmas
Àr: 2000
Ì Whoville elska øll jólini. Men langt uppi í fjøllunum býr the Grinch. Hann hatar jólini, og vil gera alt fyri at oyðileggja jólaaftan fyri fólkini í Whoville. Hann klæðir seg út sum jólamaðurin og stjelur alt jólapyntið og gávurnar. Lítla gentan, Lou Who uppdagar hann. Hon roynir at fáa the Grinch at síggja at jólini eru góð, og hann kann eisini vera partur av jólagleðini.
The Family Man
Àr: 2000
Jack Campbell er businessmaður. Hann hevur alt ein kann ynskja sær, uttan eina familju. Ein morgun vaknar hann og alt er vent á høvdinum. Ì nýggja lívinum er hann giftur og hevur tvey børn. Hann forstendur onki av hesum. Ì vónloysi roynir hann at fáa sít ríkmannalív aftur. Spakuliga byrjar hann at síggja, at ríkmannalívið hann livdi, ikki er lívið hann veruliga vildi hava.
Elf
Àr: 2003
Buddy var foreldraleysur og búði í einum barnaheimi. Av óvart endaði hann í posanum hjá jólamanninum. Uppvaksin saman við jólamanninum og hansara álvum á norðpólinum, vil hann nú finna pápa sín. Buddy ferðast til New York, har hann upplivir hvussu vanliga lívið hjá fólki í stórbýinum er.
Arthus Christmas
Àr: 2011
Hvussu fær jólamaðurin allar gávurnar út uppá eitt kvøld áðrenn jólaaftan? Við sínum high tech flogskipið og hjálp frá eldra soni sínum og álvunum. Tá allar gávurnar er avleveraðar, finnur yngri sonur jólamannin, Arthur, út av at ein gáva manglar. Tá jólamaðurin ikki veit hvat hann skal gera, fyri at fáa gávuna út, tekur Arthur uppgávuna í egnar hendur.
Four Christmases
Àr: 2008
Brad og Kate hava verið saman í trý ár. Jólamorgun, tá tey skulu fara til Fiji at halda jól, verður ferðin avlýst. Foreldrini hjá teimum báðum eru skyld, og nú mugu tey saman náa fýra jól uppá ein dag.
RT @larsloekke: Alarmeret over meget voldsom brand i #Tvøroyri. Bedste ønsker for de mange evakuerede. Klar med hjælp om nødvendigt. #føroy… 5 years ago
Sofasurfarin 