Navn: Edge of Tomorrow
Genre: Action/Sci-Fi
Àr: 2014

Tom Cruise er aftur, var mín fyrsti tanki, tá eg sá hendan filmin. Tað eru fleiri ár síðan hann hevur leikt í einum ordiligum hitti. Tað er um vit hyggja burtur frá teimum obligatorisku Mission Impossible filmunum, ið koma út í jøvnum millumbilum.

Edge of Tomorrow er gjørdur eftir skaldsøguni, All You Need is Kill, skrivað av Hiroshi Sakurazaka. Søgan fylgir Cage (Tom Cruise). Hann er offisér í militerinum, men hevur ikki livað gjøgnum ein dag av kríggi sjálvur. Kríggið er millum menniskju og eina rasu av rúmdarverum, ið vilja yvirtaka jørðina. Cage verður av sínum ovasta, móti egnum vilja, sleptur mitt í eina sjálvmorðs missión. Tá hann fer í sín fyrsta dag av kríggi, verður hann umgangandi dripin, men vaknar upp aftur dagin áðrenn. Hann finnur skjótt út av, at hann nú noyðist at liva sama dagin umaftur, hvørja ferð hann verður dripin. Nú má hann læra seg at berjast móti rúmdarverunum. Hetta ger hann við hjálp frá herkvinnuni Rita Vrataski (Emily Blunt), ið verður kallað Full Metal Bitch.

Besti háttur at lýsa hendan filmin á, er at kalla hann eina blanding av Groundog Day og Starship Troopers. Við leikstjóranum Doug Liman (The Bourne Identity), er filmurin væl útskorin. Tom Cruise og Emily Blunt rigga væl á skerminum saman. Við flottum aktion scenum, og væl úr hondum greiddari søgu, kanst tú ikki fara skeivt við hesum filminum, tá tú hevur sett tær eitt kvøld av til ein góðan og spennandi film.

Eg gevi filminum:

Um tær dámar hendan filmin, men vil hava meir, fari eg viðmæla Starship Troopers, the Terminator, Terminator: Judgment Day, Elysium og Independence Day.
Hevur tú hug til ein skemtifilm, hevur Groundhog Day eina líknandi søgu.

Navn: The Interview
Àr: 2014
Genre: Komedia

Tað gekk runt sum eldur, tá Sony avgjørdi at taka the Interview úr øllum biografum, eftir hóttanir um eina endurtøku av 11. Septembur 2001, frá hakkara bólkinum “Guardians of Peace”. Game of Thrones rithøvundurin, George R. R. Martin, vildi vísa filmin í sínum egna heimi og bjóða fólki inn, tí hann fann seg ikki í avgerðini hjá Sony. Tað fór so langt at sjálvur amerikanski forsetin, Barrack Obama, kom við einari útmelding um avgerðina hjá Sony.
Tí var tað til stóran lætta hjá nógvum, tá Sony avgjørdi at geva the Interview út tann 24. Desembur, bæði digitalt og í útvaldum biografum. Nógva umtalan hevur ikki gjørt filminum mein, men tvørturímóti streyma fólk nú í biografar at hyggja eftir filminum, og tey ið ikki kunnu síggja hann í biografi, hava leigað hann á seetheinterview.com. Ì gjárkvøldið setti eg meg væl til rættis í sofuna, at hyggja eftir mest umtalaða filminum í heiminum í løtuni.

Verturin í kjaksendingini Skylark Tonight, Dave Skylark(James Franco) og produsari/vinmaður hansara, Aaron Rapaport(Seth Rogen), senda tey nýggjastu tíðindini innan celebrity slatur. Tað býður Aaron ímóti, tá hann heldur vil útvarpa tíðindi av størri týdningi. Teir báðir fáa blóð uppá tonnina, tá teir lesa, at leiðarin í Norður Korea, Kim Jong-Un, elskar kjaksending teirra. Tá tað eydnast teimum at bóka eina samrøðu við Kim Jong-Un, mugu teir fyrireika seg at ferðast til Norður Korea. Àðrenn teir fara avstað, verða teir tiknir inn av CIA, ið vil hava Dave at myrða Kim Jong-Un.

The Interview er akkurát tað tú heldur hann er, um tú kennir filmar sum Seth Rogen og James Franco hava gjørt fammanundan. Ein kann bara fyristilla sær hvussu skeivur Seth Rogen var, tá hann fann uppá hesa søguna. Uttanum søguna, er filmurin fyri tað mesta fyltur við skemti um kynspartar og løgnar luktir.
Stemningurin millum Franco og Rogen er sterkur. Teir hava báðir eina kemi, ið tekur hyggjaran væl gjøgnum allan filmin. Við einari longd uppá næstan tveir tímar fær ein smílibondini væl og virðiliga strekt.
Tað kann ikki gerast annað enn at flenna eftir mátanum Norður Korea hevur reagerað uppá filmin. Ein flatur skemtifilmur, ið fær hakkarar at koma við tómum hóttanum um bumbukríggj og øðrum, er møguliga nakað av tí besta við hesum filminum. Tað ger hann bert meiri stuttligan, tá tú hyggur eftir honum.

Eg gevi filminum:

Um tú vil síggja meir av tí sama, fari eg at viðmæla This is the End, Pineapple Express, 40 Year Old Virgin og Superbad.
Hevur tú hug at síggja eitt av fyrstu samstørvunum millum Seth Rogen og James Franco, kanst tú hyggja eftir seriuni Freaks & Geeks.